jentrade > societât > storia

La nassite dal Acciù

DI AGNS INDI À NUIE MANCUL CHE 110, MA NO JU MOSTRE.

No je la solite frase di circostance che si dopre masse chê che o vin pensât par inviâ la storie di un dai sodalizis di balon talians plui gloriôs, ma e je la juste testemoneance dai sucès che l’Udin al è daûr a puartâ a cjase soredut in chescj ultins agns, dopo che al à cuasi tocjât il titul talian tal 1954-55, dopo di vê vint il scudet tal 1896, ancje se mai ricognossût. Parcè? Parcè che la manifestazion, un torneu a trê (li che a cjaparin part la Pg Ferrara, l'Istituto Turrazza di Trevîs e, juste apont l’Udin, o miôr la Società Udinese di Ginnastica e Scherma, fate di students des scuelis tecnichis di Udin, zuiât a Trevîs dai 6 ai 8 di Setembar), nol fo fat da la Federcalcio (che e fo istituide un an dopo), ma ben de Federazione Italiana Scherma.

I udinês a vincerin ducj i doi i incuintris, prime cul Trevîs, po dopo in finâl cu la Spal che e fo superade par 2 a 0 cuntune doplete di Antonio Dal Dan, mestri, cjapitani de scuadre, il pionîr dal balon blanc e neri.
L’an prime, ai 15 di Setembar dal 1895, la midiesime scuadre e partecipà tal Velodrom "Roma" al Salario a di une gare di esibizion cu la Virtus Bologne e spetatôr di ecezion al fo il Re Umberto I.

Daspò dal sucès dal 1896, a Udin e in dut il Friûl, il balon al scomence a fâsi strade, ancje se lis dissiplinis primariis a restin la Scherme e la Gjinastiche.

NASSITE DAL ACCIU’ - Ai 5 di Lui dal 1911 e je une altre date storiche pal balon furlan. I gjinascj dal Udin, cun a cjâf Luigi Dal Dan, fi di Antonio, a metin adun la Associazione Calcio Udinese che e ven notade inte Federazione Italiana Giuoco Calcio.
La prime gare amichevule de societât a pene nassude si davuelç a Palme te ocasion di un dai prins svoi aeris li che si misurà ancje il nodâr di Udin Cavalieri. La scuadre blancje e nere e bat la Juventus di Palme par 6 a 0.
Tal 1912 l’Udin al partecipe al campionât di promozion adun cun Petrarca Padue e cul Padue e e bat dutis i dôs, condizion indispensabil par notâsi te categorie plui alte li che al reste fin che e sclope la prime vuere mondiâl.
Tal dopovuere, par jessi precîs ai 22 di Avrîl dal 1919, la A.C. Udinese e jentre te Associazione Sportiva Udinese (ASU) e il cont Alessandro del Torso indi devente il president.

I AGNS VINCJ – A tachin cul debut dal lezendari Gino Bellotto, che al à jemplât cetantis pagjinis di glorie de storie blancje e nere. Bellotto zuiadôr bon in ogni rûl, al zuià nuie mancul che disesiet campionâts cul Udin. Un record! Record che fin cumò, jenfri i zuiadôrs blancs e neris dome Valerio Bertotto, cu lis sôs 13 stagjons une daûr chê altre, al rive a lâi dongje. Bellotto al scomençà a zuiâ tal torneu di prime categorie 1920-21. L’Udin al restà in prime categorie (ziron B) e al rivà tal ultin puest cun 5 ponts (il ziron al fo vinçût dal Gjenue).
Chê e fo une stagjon pardabon sfortunate pai colôrs blancs e neris: tal Lui dal 1922 l’Udin al è finalist de prime Cope Italie. A Vado Ligure al fronte i locâi e al piert par 1 a 0 cuntune rêt dal cetant innomenât Felice Levratto tai suplementârs.
Ai 24 di Avost dal 1923, cul Udin une vore plen di debits, la Associazione Sportiva Udinese si slontane dal balon, la societât blancje e nere e à di istituî un belanç e un diretîf autonomis dal dut. Il president Alessandro del Torso al paie ducj i debits, metint a la aste cualchidun dai siei cuadris e pôc dopo la presidence e ven cjapade dal industriâl da la bire, Francesco Dormisch.
Tal torneu 1923-24 i blancs e neris si cjatin in seconde division (vuê serie B) e si compuartin in maniere dignitose, finint al cuart puest. L’an daspò e va une vore miôr e la scuadre blancje e nere e siere il ziron D di seconde division in teste a pâr cul Vicence e l’Olimpia di Fiume. E fo necessarie la dispate par definî la scuadre che dopo e varès zuiât te finâl nazionâl, cun Parme, Como e Novese pe promozion in Prime Division, la serie A di cumò. L’Udin al rivà a superâ i flumans e i vicentins. Te finâl di dopo la scuadre furlane e sierà al prin puest a pâr cul Parme (siet ponts), prime de Novese, che di ponts indi veve concuistâts sîs e dal Como, cuatri.
In prime division – torneu 1925-26 - i furlans a àn di frontâ il Turin cul innomenât Cevenini, il Bologne, po dopo ancjemò il Modene, il Cjasâl, l’Internazionâl, il Verone Hellas, il Dorie, il Bressie, il Novare, il Pise, il Legnano.
I blancs e neris a faserin un colpat, a baterin 4 a 3 il Turin lassant che il Bologne al paronàs tal ziron e al partecipàs a lis finâls nazionâls vintis, dopo, de Juventus. L’an daspò l’Udin, refudant di partecipâ a lis cualificazions, al fo fat retrocedi. Cussì tal campionât 1926-27 i blancs e neris a forin metûts dentri tal ziron venit lombart, il prin di cuatri de gnove division (serie B di cumò). Al fo un percors disastrôs, che l’Udin al sierà al ultin puest cun dome 6 ponts. Il risultât finâl al voleve dî lâ indaûr, ma la Federazion, in considerazion dai merits de societât blancje e nere, e scancelave la boçadure. Il president dal Udin Achille Villoresi, scjampât il pericul, al rinfuarçà la scuadre che, te stagjon 1927-28, e rivà a salvâsi in maniere dignitose.
Tal torneu 1928-29, l’Udin, cun Villoresi simpri president, alenât dal tecnic ongjarês Fogl, al rivà a fâ ancjemò miôr, classificantsi al tierç puest cun 39 ponts, daûr dal Forlì (41) e dal Monfalcon (44). Cheste e fo la formazion che si compuartà in mût valorôs: Cassetti, Cantarutti, Bellotto, Gerace, Bonino, Zilli, Tosolini, Vittorio, Foni, Modotti, Dorigo. Al fo spazi ancje par Brusin, Migliorini Modonutti, Barbetti, Palmano.
Ae fin di chê anade la Federazion e met in pîts i campionâts a ziron unic; e met dongje lis cutuardis scuadris retrocedudis de categorie plui alte cu lis promessis de prime division par formâ la B. L’Udin, si cjate a jessi in serie C. L’an che al ven dopo, chel che al scree, cemût che si à dit, la rivoluzion tai variis campionâts, l’Udin nol cjale in muse nissun e al finìs al prin puest cun 42 ponts, cun daûr la Spal 39, e la Pro Gurize 35. Cheste la formazion model: Cassetti (Lipizer III), Bellotto, Loschi, Gerace, Bonino, Zilli (Magrini), Modotti (Frossi) Vittorio, Miconi (Modonutti), Bartezaghi, Dorigo. Ae fin di chê stagjon al ven dât vie cualchi “toc di novante”, Loschi ae Triestine, Cassetti al Bologne, Miconi a la Salernitane.

-->